Mondioring 係咩東東?
喺外國其實有好多唔同嘅犬隻運動比賽Dog Sports，當中Protection Dog Sports包括Mondioring、French Ring、Belgian Ring、KNPV、IPO等等。Mondioring係當中好受歡迎嘅比賽，因為呢個比賽每次都有唔同主題，例如萬聖節、西部牛仔、甚至童話故事等，場地佈置同比賽中使用嘅道具會配合主題去變化，除咗令到整個運動更有趣味性，亦顯示出狗狗嘅高水準能力，面對全新嘅環境、物件都能夠發揮表現完成各個項目。
Mondioring比賽有三大範疇：跳躍JUMP、服從Obedience、保護Protection，每個範疇入面再分細項。參賽犬隻要得到高分，唔單止要聽從指令，仲需要有自己嘅思考、分析、應變能力，同埋強健嘅體能、爆炸力。除咗狗狗，比賽裡面仲有兩個重要角色，就係領犬員Handler同埋咬捕手Decoy。Handler負責帶領狗狗參賽，狗狗喺比賽裡面要聽從Handler嘅指令，同Handler配合完成項目。Decoy就係喺Protection項目入面「俾狗咬」嘅角色，務求避開狗狗嘅咬捕令狗狗失分。
唔好以為「俾狗咬」只要唔怕痛就得，其實係一個非常高難度高技術嘅任務。1. 要保護狗狗同自己嘅安全，唔可以令狗狗受傷; 2. 利用身體姿勢動作給予狗狗興奮、刺激，測試狗狗嘅自控能力，並要因應比賽級別去調整難度; 3. 當狗狗進行攻擊，Decoy要喺著住一套幾十公斤重嘅咬捕衣(Bite Suit)嘅情況下，嘗試避開速度又快體能又強嘅狗狗嘅咬捕; 4. 要熟識各個項目嘅規則，順利協助比賽進行。
玩Protection Sports嘅狗狗一定係凶狠唔友善嘅狗狗? 其實受訓練嘅狗狗非常明白運動嘅規則，清楚自己嘅工作，只會喺有指令或需要嘅時候(例如Handler受攻擊) 至會作出攻擊動作，而且當Handler發出停止嘅指令就會立刻停落嚟。喺平日唔係進行運動練習或比賽嘅時候，狗狗一樣可以同人類非常親近，而且因為透過訓練，狗狗建立咗自信心同對人類嘅信任，所以比一般狗狗情緒更穩定，而且Handler / Trainer同狗狗嘅關係往往比一般主人同寵物嘅關係更密切更深厚。
聚萌嘅Trainer早前去咗老撾特訓三個月，提昇對Mondioring以及French Ring嘅知識同技巧。點解去老撾? 因為嗰度有一位世外高人 - Somsack Sodachann。Somsack係一位喺法國長大嘅老撾人，16歲嘅時候喺法國軍隊被委派領犬員一職，發現自己同狗特別有默契同對訓犬充滿熱忱，從此就同訓犬結下不解緣。離開軍隊之後Somsack邊打工邊學French Ring，同佢當時嘅愛犬馬蓮萊Rime一齊訓練，並一步步通過考核成為Decoy，仲同Rime一齊進升到French Ring Selective Level (比Ring III 更高Level)! 同時Somsack於巴黎成立咗一間專門訓練犬隻及野生動物(包括狼)拍攝廣告、電影嘅公司，參與多部國際電影拍攝。三十歳嘅時候，為咗尋根，Somsack返咗老撾並定居落嚟，繼續從事訓犬工作，喺東南亞闖出另一片天，好多狗主仲專程將狗狗由越南、泰國帶到去老撾俾Somsack訓練。Somsack亦致力喺東南亞國家推廣Dog Sports文化，2022年11月將會喺老撾舉辦一場Mondioring Seminar，邀請到國際嘅Dog Sports高手同場交流。聚萌Trainer Jack Sir好開心亦獲邀參與，希望可以將更多Dog Sports以及訓犬文化知識帶返香港。
如果你對Protection Dog Sports有興趣，歡迎同聚萌聯絡。Whatsapp: 852-93889783
